JANUARY 8, 2024 MGA PAGBASA

 Feast of the Baptism of the Lord (White)

UNANG PAGBASA

Isaias 55, 1-11

Pagbasa mula sa aklat ni propeta Isaias

Sinabi ng Panginoon, “Narito ang tubig, mga nauuhaw.

Ang mga walang salapi ay

kumuha rito at bumili ng pagkain.

Halikayo at bumili ng alak at gatas,

bumili kayo, ngunit walang bayad.

Bakit ginugugol ang salapi

sa mga bagay na hindi nakabubusog?

Bakit inuubos ang pera

sa mga bagay na walang halaga?

Makinig kayo sa akin at sundin ang utos ko

at matitikman ninyo ang pinakamasarap na pagkain.

Pumarito kayo,

kayo ay lumapit at ako’y pakinggan,

makinig sa akin nang kayo’y mabuhay;

ako’y may gagawing walang hanggang tipan,

at ipalalasap sa inyo ang pagpapalang

ipinangako ko kay David.

Ginawa ko siyang hari

at puno ng mga bansa

at sa pamamagitan niya’y ipinamalas ang aking kapangyarihan.

Iyong tatawagin ang mga bansang hindi mo kilala,

mga bansang di ka kilala’y sa iyo pupunta,

dahilan sa Panginoon,

Banal ng Israel,

ang Diyos na nagpala’t sa iyo’y dumakila.”

Hanapin ang Panginoon

samantalang siya’y iyong makikita,

Siya ay tawagin habang malapit pa.

Ang mga gawain ng taong masama’y

dapat nang talikdan, at ang mga liko’y

dapat magbago na ng maling isipan;

sila’y manumbalik,

lumapit sa Panginoon upang kahabagan,

at mula sa Diyos,

matatamo nila ang kapatawaran,

Ang wika ng Panginoon:

“Ang aking isipa’y di ninyo isipan,

at magkaiba ang ating daan.

Kung paanong ang langit

higit na mataas, mataas sa lupa,

ang daa’t isip ko’y

hindi maaabot ng inyong akala.

Ang ulan at niyebe

paglagpak sa lupa’y di na nagbabalik,

aagos na ito sa balat ng lupa’t nagiging pandilig,

kaya may pagkai’t butil na panghasik.

Ganyan din ang aking mga salita,

magaganap nito ang lahat kong nasa.”

Ang Salita ng Diyos.

Sapagkat ang Poon ang lahat sa akin,
siya ang aking awit, ang aking kaligtasan.
Malugod kayong sasalok ng tubig at batis ng kaligtasan.

May galak tayong sumalok
sa batis ng Manunubos.

Magpasalamat kayo sa Poon
Siya ang inyong tawagan;
Ipaalam ninyo sa mga bansa ang kanyang ginawa.
Ipahayag ninyo ang kadakilaan ng kanyang pangalan.

May galak tayong sumalok
sa batis ng Manunubos.

Umawit kayo ng papuri sa Poon,
sapagkat kahanga-hanga ang kanyang mga ginawa,
ipahayag ninyo ito sa buong daigdig.
Mga anak ng Sion, umawit kayo nang buong galak,
sapagkat nasa piling ninyo ang dakila at ang Banal ng Israel.

May galak tayong sumalok
sa batis ng Manunubos.

ALELUYA
Juan 1, 29

Aleluya! Aleluya!
Ito ang Kordero ng D’yos,
ang sala ng sansinukob
pinapawi niyang lubos.
Aleluya! Aleluya!

MABUTING BALITA
Marcos 1, 7-11

Ang Mabuting Balita ng Panginoon ayon kay San Marcos

Noong panahong iyon, sinasabi ni Juan Bautista sa kanyang pangangaral: “Darating na kasunod ko ang isang makapangyarihan kaysa sa akin: ni hindi ako karapat-dapat magkalag ng tali ng kanyang mga panyapak. Binibinyagan ko kayo sa tubig, ngunit bibinyagan niya kayo sa Espiritu Santo.”

Hindi nagluwat, dumating si Hesus mula sa Nazaret, Galilea, at siya’y bininyagan ni Juan sa Ilog-Jordan. Pagkaahung-pagkaahon ni Hesus sa tubig ay nakita niyang nabuksan ang kalangitan, at bumababa sa kanya ang Espiritu na gaya ng isang kalapati. At isang tinig ang nagmula sa langit: “Ikaw ang minamahal kong Anak, lubos kitang kinalulugdan.”

Ang Mabuting Balita ng Panginoon.

THE EPIPHANY OF OUR LORD - JANUARY 7, 2024

Solemnity of the Epiphany of the Lord (White)

UNANG PAGBASA

Isaias 60, 1-6

Pagbasa mula sa aklat ni propeta Isaias

Bumangon ka, Jerusalem,

at magliwanag na tulad ng araw.

Nililiwanagan ka ng kaningningan ng Panginoon.

Mababalot ng dilim ang ibang mga bansa;

ngunit ikaw ay liliwanagan ng Panginoon

sa pamamagitan ng kanyang kaningningan.

Sa ningning ng iyong taglay na liwanag,

yaong mga bansa, sampu ng mga hari’y lalapit na kusa.

Tumingin ka sa paligid

at tingnan mo ang nagaganap.

Ang mga anak mo’y nagtitipon na upang umuwi.

Ang mga lalaki’y magmumula sa malayo,

ang mga babae’y kargang tila mga bata,

ang tanawing ito kung iyong mamalas, ikaw ay sisigla,

sa iyong damdami’y pawang kagalakan yaong madarama;

pagkat ang yaman

niyong karagata’y iyong matatamo,

at ang kayamanan ng maraming bansa

ay makakamtan mo.

Maraming pangkat na nakasakay

sa kamelyo ang darating mula sa Madian at Efa.

At sa Seba nama’y darating silang

may taglay na mga ginto at kamanyang.

Ihahayag ng mga tao ang magandang balita

tungkol sa ginawa ng Diyos.

Ang Salita ng Diyos.

SALMONG TUGUNAN

Salmo 71, 2. 7-8. 10-11. 12-13

Poon, maglilingkod sa ‘yo,

tanang bansa nitong mundo.

Turuan mo yaong haring humatol ng katuwiran,

sa taglay mong katarungan, O Diyos, siya’y bahaginan;

upang siya’y maging tapat mamahala sa ‘yong bayan,

at pati sa mahihirap maging tapat siyang tunay.

Poon, maglilingkod sa ‘yo,

tanang bansa nitong mundo.

Yaong buhay na mat’wid sa kanyang kapanahunan,

madama ng bansa niya at umunlad habang buhay.

Yaong kanyang kaharian ay palawak nang palawak,

mula sa Ilog Eufrates, sa daigdig ay kakalat.

Poon, maglilingkod sa ‘yo,

tanang bansa nitong mundo.

Mga haring nasa pulo at naroon sa Espanya

maghahandog ng kaloob, ihahain din sa kanya

pati yaong mga hari ng Arabia at Etiopia,

may mga kaloob ding taglay nilang alaala.

Ang lahat ng mga hari, gagalang sa harap niya,

mga bansa’y magpupuri’t maglilingkod sa tuwina.

Poon, maglilingkod sa ‘yo,

tanang bansa nitong mundo.

Kanya namang ililigtas ang sinumang tumatawag,

lalo yaong nalimot nang mga taong mahihirap;

sa ganitong mga tao siya’y lubhang nahahabag sa kanila tumutulong, upang sila ay maligtas.

Poon, maglilingkod sa ‘yo,

tanang bansa nitong mundo.

IKALAWANG PAGBASA

Efeso 3, 2-3a. 5-6

Pagbasa mula sa sulat ni Apostol San Pablo sa mga taga-Efeso

Mga kapatid:

Marahil naman, nabalitaan na ninyong dahil sa kagandahang-loob ng Diyos ay ipinagkatiwala niya sa akin ang tungkuling ito para sa inyong kapakinabangan. Ipinahayag sa akin ng Diyos ang kanyang lihim na panukala. Ang hiwagang ito’y hindi ipinaalam sa mga tao noong mga nakaraang panahon, ngunit inihayag ngayon ng Diyos, sa pamamagitan ng Espiritu, sa kanyang mga banal na apostol at mga propeta. At ito ang lihim: sa pamamagitan ng Mabuting Balita, ang mga Hentil, tulad din ng mga Judio, ay may bahagi sa mga pagpapalang mula sa Diyos; mga bahagi rin sila ng iisang katawan at kahati sa pangako ng Diyos dahil kay Kristo Hesus.

Ang Salita ng Diyos.

ALELUYA

Mateo 2, 2

Aleluya! Aleluya!

Ang tala’y aming nakita

kaya’t kami’y nagsipunta

upang sa Poon sumamba.

Aleluya! Aleluya!

MABUTING BALITA

Mateo 2, 1-12

Ang Mabuting Balita ng Panginoon ayon kay San Mateo

Si Hesus ay ipinanganak sa Betlehem ng Judea noong kapanahunan ni haring Herodes. Dumating naman sa Jerusalem ang ilang Pantas mula sa Silangan at nagtanung-tanong doon: “Nasaan ang ipinanganak na Hari ng mga Judio? Nakita namin sa Silangan ang kanyang tala at naparito kami upang sambahin siya.”

Nang mabalitaan ito ni haring Herodes, siya’y naligalig, gayun din ang buong Jerusalem. Kaya’t tinipon niya ang lahat ng punong saserdote at mga eskriba sa Israel at itinanong sa kanila kung saan ipinanganak ang Mesiyas. “Sa Betlehem po ng Judea,” tugon nila. “Ganito ang sinulat ng propeta:

‘At ikaw, Betlehem, sa lupain ng Juda,

ay hindi nga huli sa mga pangunahing bayan ng Juda.

Sapagkat sa iyo lilitaw ang isang pinuno

na mamamahala sa aking bayang Israel.’”

Nang mabatid ito, lihim na ipinatawag ni Herodes ang mga Pantas at itinanong kung kailan lumitaw ang mga tala. At pinalakad niya sila patungong Betlehem matapos pabilinan ng ganito: “Humayo kayo at inyong hanaping mabuti ang sanggol. Kapag inyong natagpuan, ibalita agad ninyo sa akin upang ako may makasamba sa kanya.” At lumakad na nga ang mga Pantas. Muli silang pinangunahan ng talang nakita nila sa silangan hanggang sa sumapit ito sa tapat ng kinaroroonan ng bata gayun na lamang ang galak ng mga Pantas nang makita ang tala! Pagpasok sa bahay, nakita nila ang bata sa piling ng kanyang inang si Maria. Lumapit sila at nagpatirapa at sinamba ang bata. Binuksan nila ang kanilang mga sisidlan at inihandog sa kanya ang dala nilang ginto, kamanyang at mira.

Nang sila’y pabalik na, sinabi sa kanila ng Diyos sa pamamagitan ng panaginip na huwag na silang babalik kay Herodes. Kaya, nag-iba na sila ng daan pauwi.

Ang Mabuting Balita ng Panginoon.

JANUARY 6, 2024 MGAPAGBASA

Ika 6 ng ENERO 2024

Weekday of Christmas Season (White)

UNANG PAGBASA

1 Juan 5, 5-13

Pagbasa mula sa unang sulat ni Apostol San Juan

Minamahal kong mga kapatid, sino ang makapagtatagumpay laban sa sanlibutan? Ang sumasampalatayang si Hesus ang Anak ng Diyos. Si Hesukristo ang naparito sa sanlibutan, bininyagan sa tubig, at nagbubo ng kanyang dugo sa kanyang kamatayan – hindi lamang bininyagan sa tubig, kundi nagbubo pa ng kanyang dugo. Ang Espiritu ang nagpapatotoo tungkol dito, sapagkat ang Espiritu ay katotohanan. Tatlo ang nagpapatotoo: ang Espiritu, ang tubig, at ang dugo; at nagkakaisa ang tatlong ito. Tinatanggap natin ang patotoo ng tao, ngunit lalong matibay ang patotoo ng Diyos, at iyon ang patotoo ng Diyos tungkol sa kanyang Anak. Ang sinumang nananalig sa Anak ng Diyos ay naniniwala sa patotoong ito. Ngunit ang ayaw maniwala sa Diyos ay ginagawang sinungaling ang Diyos, sapagkat hindi siya naniniwala sa patotoo nito tungkol sa kanyang Anak. At ito ang patotoo: ipinagkaloob sa atin ng Diyos ang buhay na walang hanggan at ito’y makakamtan natin sa pamamagitan ng kanyang Anak. Ang pinananahanan ng Anak ng Diyos ay may buhay na walang hanggan, ngunit wala nito ang hindi pinananahan ng Anak ng Diyos. Isinusulat ko ito sa inyo upang malaman ninyo na kayong nananalig sa Anak ng Diyos ay may buhay na walang hanggan.

Ang Salita ng Diyos.

SALMONG TUGUNAN

Salmo 147, 12-13. 14-15. 19-20

Purihin mo, Jerusalem,

ang Panginoong butihin.

o kaya: Aleluya.

Purihin mo, Jerusalem, purihin ang Panginoon,

purihin mo ang iyong Diyos, kayong mga taga-Sion.

Yaong mga pintuan mo ay siya ang nag-iingat,

ang lahat ng iyong lingkod ay siya ang nagbabasbas.

Purihin mo, Jerusalem,

ang Panginoong butihin.

o kaya: Aleluya.

Ginagawang matahimik yaong mga hangganan mo,

bibigyan kang kasiyahan sa kaloob niyang trigo.

Kung siya ay nag-uutos, agad itong natutupad,

dumarating sa daigdig, na hindi na nagluluwat.

Purihin mo, Jerusalem,

ang Panginoong butihin.

o kaya: Aleluya.

Kay Jacob n’ya ibinigay ang balita at pabilin,

ang tuntuni’t mga aral, ibinigay sa Israel Ang ganitong karapatan ay wala ang ibang bansa,

pagkat hindi nila batid ang utos na itinakda.

Purihin ang Panginoon!

Purihin mo, Jerusalem,

ang Panginoong butihin.

o kaya: Aleluya.

ALELUYA

Marcos 9, 6

Aleluya! Aleluya!

Nagsalita ang Diyos Ama:

“Ang Anak kong sinisinta

ay narito, dinggin n’yo siya!”

Aleluya! Aleluya!

MABUTING BALITA

Marcos 1, 7-11

Ang Mabuting Balita ng Panginoon ayon kay San Marcos

Noong panahong iyon, sinasabi ni Juan Bautista sa kanyang pangangaral: “Darating na kasunod ko ang isang makapangyarihan kaysa sa akin: ni hindi ako karapat-dapat magkalag ng tali ng kanyang mga panyapak. Binibinyagan ko kayo sa tubig, ngunit bibinyagan niya kayo sa Espiritu Santo.”

Hindi nagluwat, dumating si Hesus mula sa Nazaret, Galilea, at siya’y bininyagan ni Juan sa Ilog-Jordan. Pagkaahung-pagkaahon ni Hesus sa tubig ay nakita niyang nabuksan ang kalangitan, at bumababa sa kanya ang Espiritu na gaya ng isang kalapati. At isang tinig ang nagmula sa langit: “Ikaw ang minamahal kong Anak, lubos kitang kinalulugdan.”

Ang Mabuting Balita ng Panginoon.

o kaya

Lucas 3, 23-28

Ang Mabuting Balita ng Panginoon ayon kay San Lucas

Noong panahong iyon, magtatatlumpung taon na si Hesus nang magsimula siyang mangaral. Ayon sa palagay ng mga tao, siya’y anak ni Jose na anak ni Eli, na anak ni Matat. Si Matat ay anak ni Levi na anak ni Melqui, at si Melqui naman’y anak ni Jana na anak ni Jose. Si Jose’y anak ni Matatias na anak ni Amos. Itong si Amos ay anak ni Nahum na anak ni Esli. Si Elsi’y anak naman ni Nage, anak ni Maat na anak ni Matatias. Si Matatias ay anak ni Semei na anak ni Jose. Si Jose’y anak ni Juda na anak ni Joana. At si Joana ay anak naman ni Resa na anak ni Zorobabel, anak ni Salatiel na anak naman ni Neri. Si Neri’y anak ni Melqui na anak ni Adi. Si Adi ay anak ni Cosam na anak ni Elmodam, na anak ni Er. Si Er nama’y anak ni Josue na anak ni Eliezer, anak ni Jorim na anak ni Matat. Si Matat ay anak ni Levi na anak ni Simeong anak ni Juda. Si Juda’y anak naman ni Jose. Si Jose’y anak ni Jonan na anak ni Eliaquim, na anak ni Melea. Itong si Melea’y anak ni Mainan na anak ni Matata, anak ni Natan na anak ni David. Si David ay anak ni Jesse na anak ni Obed, at si Obed ay anak naman ni Booz. Si Booz ay anak ni Salmon na anak ni Naason, anak ni Aminadab na anak ni Admin. Si Admin ay anak naman ni Arni na anak ni Esrom, na anak naman ni Fares. Si Fares ay anak ni Juda na anak ni Jacob. Si Jacob ay anak ni Isaac na anak naman ni Abraham. Si Abraham ay anak ni Tare na anak ni Nacor. Si Nacor ay anak ni Serug na anak ni Ragau, na anak naman ni Peleg, at si Peleg ay anak ni Heber na anak ni Sala. Si Sala’y anak ni Cainan na anak ni Arfaxad na anak naman ni Sem. Si Sem ay anak ni Noe, anak ni Lamec na anak ni Matusalem na anak naman ni Enoc. Si Enoc ay anak ni Jared na anak ni Mahalaleel na anak ni Cainan. Si Cainan ay anak ni Enos na anak naman ni Set. At si Set ay anak ni Adan na anak ng Diyos.

UNANG ALAY (LYRICS AND CHORDS)

 Intro: C-G-Am-Am7-BbM7-G

Chorus
C           G                   Am      C
Kunin at tanggapin ang alay na ito
FM7               C               BbM7       G7
Mga biyayang nagmula sa pagpapala mo
FM7                  C         E7                Am - D7
Tanda ng bawat pusong pagkat inibig Mo
C                G7           C
Ngayo'y nananalig, nagmamahal sa 'yo

Verse 1
Am              Em          F           C
Tinapay na nag mula sa butil ng trigo
Am             Dm                   G7
Pagkain nagbibigay ng buhay mo
Am        Em          Dm                     C
At alak na nagmula sa isang tangkay ng ubas
FM7        BbM7     G7
Inuming nagbibigay lakas! (Repeat chorus)

Verse 2 (same chord progression with verse 1)

Lahat ng mga lungkot ligaya't pagsubok

Lahat ng lakas at kahinaan ko

Inaalay kong lahat buong pagkatao

Ito ay issunod sa 'yo (Repeat chorus)

Verse 3 (same chord progression with verse 1)

Ang bayang inibig mo ngayo'y umaawit

Sa 'yo ay sumasamba't nananalig

Umaasang diringgin ang bawat dalanging

Sa alay na ito'y nakalakip (Repeat chorus)

JANUARY 5, 2024 - MGA PAGBASA

Ika- 5 ng Enero, 2024

Memorial of Saints Basil the Great and Gregory Nazianzen, Bishops and Doctors of the Church (White)

UNANG PAGBASA

1 Juan 2, 22-28

Pagbasa mula sa unang sulat ni Apostol San Juan

Minamahal kong mga kapatid, sino ang sinungaling? Hindi ba ang tumatangging si Hesus ang Kristo? Ito nga ang anti-Kristo: ang ayaw kumilala sa Ama at sa Anak. Ang di kumikilala sa Anak ay di rin kumikilala sa Ama. Kapag tinanggap ninuman ang Anak, pati ang Ama’y sasakanya.

Pakaingatan ninyo sa inyong puso ang narinig ninyo sa simula pa. Kung gawin ninyo ito, mananatili kayo sa Anak at sa Ama. At ito ang ipinangako sa atin ni Kristo: buhay na walang haggan.

Ang isinulat ko sa inyo ay ang tungkol sa mga nagnanasang magligaw sa inyo. Ang Espiritu’y ipinagkaloob na ni Kristo sa inyo. At habang siya’y nananatili sa inyo, hindi na kailangang turuan kayo ninuman. Ang Espiritu ang nagtuturo sa inyo sa lahat ng bagay, at totoo ang itinuturo niya – hindi kasinungalingan. At tulad ng itinuro ng Espiritu, manatili kayo kay Kristo.

Kaya nga, mga anak, manatili kayo sa kanya upang maging panatag ang ating loob sa muling pagparito niya at hindi tayo mahiya sa kanya sa araw na yaon.

Ang Salita ng Diyos.

SALMONG TUGUNAN

Salmo 97, 1. 2-3ab. 3kd-4

Kahit saa’y namamalas,

tagumpay ng Nagliligtas.

Umawit ng bagong awit at sa Poon ay ialay,

pagkat yaong ginawa n’ya ay kahanga-hangang tunay!

Sa sariling lakas niya at taglay na kabanalan,

walang hirap na natamo yaong hangad na tagumpay.

Kahit saa’y namamalas,

tagumpay ng Nagliligtas.

Ang tagumpay niyang ito’y siya na rin ang naghayag,

sa harap ng mga bansa’y nahayag ang pagliligtas.

Ang pangako sa Israel lubos niyang tinutupad.

Kahit saa’y namamalas,

tagumpay ng Nagliligtas.

Tapat siya sa kanila at ang pag-ibig ay wagas

Ang tagumpay ng ating Diyos kahit saan ay namalas!

Magkaingay na may galak, yaong lahat sa daigdig;

ang Poon ay buong galak na purihin sa pag-awit!

Kahit saa’y namamalas,

tagumpay ng Nagliligtas.

ALELUYA

Hebreo 1, 1-2

Aleluya! Aleluya!

N’ong dati’y mga propeta

ngayon nama’y Anak niya

ang sugo ng D’yos na Ama.

Aleluya! Aleluya!

MABUTING BALITA

Juan 1, 19-28

Ang Mabuting Balita ng Panginoon ayon kay San Juan

Nang suguin ng mga Judio sa Jerusalem ang ilang saserdote at Levita upang itanong kung sino siya, sinabi ni Juan ang katotohanan. Sinabi niyang hindi siya ang Mesias. “Kung gayo’y sino ka?” tanong nila. “Ikaw ba si Elias?” “Hindi po,” tugon niya. “Ikaw ba ang Propetang hinihintay namin?” Sumagot siya, “Hindi po.” “Sino ka kung gayun?” Tanong nila uli. “Sabihin mo sa amin para masabi namin sa mga nagsugo sa amin. Ano ang masasabi mo tungkol sa iyong sarili?” Sumagot si Juan, “Ako ‘Ang tinig ng isang sumisigaw sa ilang: Tuwirin ninyo ang daraanan ng Panginoon!’” Ang Propeta Isaias ang maysabi nito. Ang mga nagtanong ay sugo ng mga Pariseo. Muli nilang tinanong si Juan, “Bakit ka nagbibinyag, hindi pala naman ikaw ang Mesias, ni si Elias, ni ang Propeta?” Sumagot siya, “Ako’y nagbibinyag sa tubig, ngunit nasa gitna ninyo ang isang hindi ninyo nakikilala. Siya ang susunod sa akin, subalit hindi ako karapat-dapat magkalag man lamang ng tali ng kanyang panyapak.” Ito’y nangyari sa Betania, sa ibayo ng Jordan na pinagbibinyagan ni Juan.

Ang Mabuting Balita ng Panginoon.

JANUARY 4, 2024 MGA PAGBASA

 Enero 4, 2024

Weekday of Christmas Season (White)

UNANG PAGBASA
1 Juan 3, 7-10

Pagbasa mula sa unang sulat ni Apostol San Juan

Mga anak, huwag kayong padaya kaninuman! Ang sinumang gumagawa ng matuwid ay matuwid, katulad ni Kristo. Ang nagpapatuloy sa pagkakasala ay kampon ng diyablo, sapagkat sa simula pa’y gumagawa na ng kasalanan ang diyablo. At naparito ang Anak ng Diyos upang wasakin ang mga gawa ng diyablo.

Ang tinanggap ng Diyos bilang anak niya ay hindi nagpapatuloy sa pagkakasala, sapagkat siya’y may bagong buhay na galing sa Diyos. At yamang ang Diyos ang Ama niya, hindi siya maaaring magpatuloy sa pagkakasala. Dito makikilala kung sino ang mga anak ng Diyos, at kung sino ang mga anak ng diyablo: ang sinumang hindi gumagawa ng matuwid at hindi umiibig sa kanyang kapatid ay hindi anak ng Diyos.

Ang Salita ng Diyos.

SALMONG TUGUNAN
Salmo 97, 1. 7-8. 9

Kahit saa’y namamalas
tagumpay ng Nagliligtas.

Umawit ng bagong awit, sa Panginoo’y ialay,
pagkat yaong ginawa n’ya ay kahanga-hangang tunay!
Sa sariling lakas niya at taglay na kabanalan,
walang hirap na natamo yaong hangad na tagumpay.

Kahit saa’y namamalas
tagumpay ng Nagliligtas.

Umingay ka, karagatan, at lahat ng lumalangoy,
umawit ang daigdigan at lahat ng naroroon.
Umugong sa palakpakan pati yaong kalaliman;
umawit ding nagagalak ang lahat ng kabundukan.

Kahit saa’y namamalas
tagumpay ng Nagliligtas.

Pagkat siya’y dumarating maghahari sa daigdig;
taglay niya’y katarungan at paghatol na matuwid.

Kahit saa’y namamalas
tagumpay ng Nagliligtas.

ALELUYA
Hebreo 1, 1-2

Aleluya! Aleluya!
N’ong dati’y mga propeta,
ngayon nama’y Anak niya
ang sugo ng D’yos na Ama.
Aleluya! Aleluya!

MABUTING BALITA
Juan 1, 35-42

Ang Mabuting Balita ng Panginoon ayon kay San Juan

Noong panahong iyon, naroon uli si Juan at ang dalawa sa kanyang mga alagad. Nakita niya si Hesus na nagdaraan, at kanyang sinabing, “Ito ang Kordero ng Diyos!” Narinig ng dalawang alagad ang sinabi niya, at sumunod sila kay Hesus. Lumingon si Hesus at nang makitang sumusunod sila ay kanyang tinanong, “Ano ang hinahanap ninyo?” Sumagot sila, “Saan po kayo nakatira, Rabi?” Ang kahulugan ng salitang ito’y Guro. “Halikayo at tingnan ninyo,” ani Hesus. Sumama sila at nakita nila ang kanyang tinitirhan; at tumuloy sila roon nang araw na yaon. Noo’y mag-iikaapat na ng hapon.

Ang isa sa dalawang nakarinig kay Juan at sumunod kay Hesus ay si Andres na kapatid ni Simon Pedro. Una niyang hinanap ang kapatid niyang ito, at kanyang sinabi sa kanya, “Natagpuan namin ang Mesias!” Ang kahulugan ng salitang ito’y Kristo. At siya’y isinama ni Andres kay Hesus. Tiningnan ni Hesus si Simon at sinabi sa kanya, “Ikaw si Simon na anak ni Juan. Ang ipangangalan ko sa iyo’y Cefas.” Ang katumbas ng ngalang ito’y Pedro.

Ang Mabuting Balita ng Panginoon.

JANUARY 3, 2024 MGA PAGBASA

 Ika 3 ng Enero, 2024

Weekday of Christmas Season (White)

UNANG PAGBASA
1 Juan 2, 29 – 3, 6

Pagbasa mula sa unang sulat ni Apostol San Juan

Minamahal kong mga kapatid, kung alam ninyong si Kristo’y matuwid, dapat din ninyong malamang ang bawat gumagawa ng matuwid ay anak ng Diyos.

Isipin ninyo kung gaano kalaki ang pag-ibig sa atin ng Ama! Tinatawag niya tayong mga anak ng Diyos – at iyan ang totoo. Ito ang dahilan kung bakit hindi tayo nakikilala ng mga makasanlibutan: hindi nila kinikilala ang Diyos. Mga minamahal, sa ngayon, tayo’y mga anak ng Diyos, ngunit hindi pa nahahayag ang magiging kalagayan natin. Gayunman, alam nating sa pagparitong muli ni Kristo, tayo’y matutulad sa kanya, sapagkat makikita natin siya sa kanyang likas na kalagayan. Kaya’t ang sinumang may pag-asa sa kanya ay nagpapakalinis, tulad ni Kristo – siya’y malinis.

Ang bawat nagkakasala ay lumalabag sa kautusan ng Diyos, sapagkat ang kasalanan ay paglabag sa kautusan. Nalalaman ninyong naparito si Kristo upang pawiin ang ating mga kasalanan; at siya’y walang kasalanan. Ang nananatili sa kanya ay hindi nagpapatuloy sa pagkakasala. Ang sinumang nagpapatuloy sa pagkakasala ay hindi nakakita ni nakakilala sa kanya.

Ang Salita ng Diyos.

SALMONG TUGUNAN
Salmo 97, 1. 3kd-4. 5-6

Kahit saa’y namamalas
tagumpay ng Nagliligtas.

Umawit ng bagong awit, sa Panginoo’y ialay,
pagkat yaong ginawa n’ya ay kahanga-hangang tunay,
sa sariling lakas n’ya at taglay na kabanalan,
walang hirap na natamo yaong hangad na tagumpay.

Kahit saa’y namamalas
tagumpay ng Nagliligtas.

Ang tagumpay ng ating Diyos kahit saan ay namalas,
yaong lahat sa daigdig, magsipagbunying may galak
Panginoo’y papurihan sa kagalakan ng lahat.

Kahit saa’y namamalas
tagumpay ng Nagliligtas.

Sa saliw ng mga lira iparinig yaong tugtog,
ang Panginoo’y purihin ng tugtuging maalindog.
Tugtugin din ang trumpeta na kasaliw ang tambuli,
ipagbunyi nating lahat, Panginoong ating hari.

Kahit saa’y namamalas
tagumpay ng Nagliligtas.

MABUTING BALITA
Juan 1, 29-34

Ang Mabuting Balita ng Panginoon ayon kay San Juan

Kinabukasan, nakita ni Juan si Hesus na lumalapit sa kanya. Sinabi niya, “Ito ang Kordero ng Diyos. Ito ang nag-aalis ng mga kasalanan ng sanlibutan! Siya ang tinutukoy ko nang sabihin kong dumarating na kasunod ko ang isang higit sa akin sapagkat siya’y siya na bago pa ako ipanganak. Hindi ko rin siya lubos na nakikilala noon, bagamat ako’y naparitong nagbibinyag sa tubig upang ipakilala siya sa Israel.”

Ito ang patotoo ni Juan, “Nakita ko ang Espiritung bumababa buhat sa langit, gaya ng isang kalapati, at nanatili sa kanya. Hindi ko nga siya lubos na nakikilala noon, ngunit ang nagsugo sa akin upang magbinyag sa tubig ang nagsabi sa akin, ‘Makikita mo ang Espiritu na bababa at mananatili sa isang tao – siya ang magbibinyag sa pamamagitan ng Espiritu Santo.’ Nakita ko ito, at pinatototohanan kong siya ang Anak ng Diyos.”

Ang Mabuting Balita ng Panginoon.